Drejtori Ekzekutiv i FIBA-s, Kamil Novak sot viziton Kosovën
Prishtinë(AsistiOnline) – Federata e Basketbollit e Kosovës ka njoftuar se drejtori ekzekutiv i FIBA Evropës, Kamil Novak do të qëndrojë sot për një vizitë një ditore në Kosovë.
Në njoftimin e FBK-së, shkruan se Novak do të vizitojë Kosovën për të përkrahur Federatën e Basketbollit të Kosovës (FBK) për punën e madhe që po e bën Bordi i FBK-së në krye me Kryetarin, Arben Fetahu në zhvillimin e basketbollit në Kosovë.
Drejtori Ekzekutiv i FIBA Evropës fillimisht pritet të vizitojë zyrat e FBK-së dhe më pas do të ketë një drekë pune me Komitetin Ekzekutiv të FBK-së.
Novak do të jetë i pranishëm në ndeshjen Kosova-Malta që zhvillohet në kuadër të Kampionatit Evropian, Divizioni C për meshkuj U16. Ky takim zhvillohet nga ora 17:30 në palestrën “1 Tetori” në Prishtinë.
Pas kësaj sfide, Kamil Novak udhëton në Prizren, i shoqëruar nga zyrtarët e lartë të FBK-së, ku do të ndjek nga afër përballjen mes Kosovës dhe Zvicrës, në kuadër të Rrethit të Tretë Parakualifikues për Eurobasket 2025. /AsistiOnline.com/
Komentet janë të mbyllura.