HAXHIU: NË LETËR E LEHTË, POR DUHET TË MENDOHEN TË GJITHA SKENARET

nga Asisti Online në 09/05/2020

Prishtinë(AsistiOnline) – Ideja për krijimin e ligës mbarëkombëtare po vazhdon të ngjallë reagime edhe tek basketbollistët vendorë aktiv.

Në një bisedë me AsistiOnline.com, basketbollisti i Trepçës, Valdrin Haxhiu këtë ide e ka parë si shumë pozitive dhe beson se mund të realizohet, por që duhet pasur kujdes me organizimin e saj.

”Ideja për krijimin e ligës së përbashkët me Shqipërinë për ne lojtarët do të ishte më shumë se e mirëseardhur duke ditur që do kishim më shumë takime, më shumë konkonkurencë, do të ishte edhe më atraktive për shikuesit, duke ditur që do kishim ekipe të ndryshme dhe të panjohura për shikuesit, por edhe për ne si ekipe.

Realizimi i këtij projekti besoj që nuk është edhe aq i lehtë siç pretendohet, mirëpo dëshira e dy Federateve nëse është në nivelin e duhur mund edhe të ndodhë, por Federatat përkatëse mendoj që duhen të kenë parasysh se buxheti i secilit ekip do të duhej të ishte në nivel të kënaqshëm, duke ditur që përpos shpenzimeve standarde brenda Kosovës, tani duhet edhe të udhëtojmë edhe normalisht që një lojë nga Mitrovica në Sarandë do të duhej të kishte së paku 2-3 ditë për tu perfundura vajtje-ardhja, akomodimi të gjitha këto do jenë ekstra shpenzime për ekipet, prandaj realizimin e këtij projekti e shoh me rezerva, duke shpresuar të ndodh.

Në rast se krijohet me siguri të plotë e besoj që suksesi dhe përfitimi nga ky projekt do të ishte i dyanshëm, ndoshta më shumë edhe për Shqipërinë, duke ditur që mund të përfitojnë nga ekipet kosovare me renome në vendin tonë”, tha Haxhiu.