EKSKLUZIVE: PRONONCIMI I KREUT TË FIBA EUROPE, DHËNË ASISTIT-ONLINE NË LIDHJE ME ”LIGËN UNIKE”
Prishtinë(AsistiOnline) – Presidenti i FIBA Evropës, Turgay Demirel ditën e djeshme ishte pranishëm në ceremoninë e nënshkrimit të marrëveshjes për themelimin e Ligës Unike mes Kosovës dhe Shqipërisë në basketboll e mbajtur në Tiranë.
Presidenti i FIBA Evropës, Turgay Demirel në një prononcim ekskluziv për AsistiOnline.com e ka përshëndetur këtë marrëveshje, duke ofruar përkrahjen e tij dhe të institucionit që drejton për këtë ligë, por edhe për basketbollin e Kosovës dhe atë të Shqipërisë. Ai përgëzoi dy federatat për këtë iniciativë, sidomos në këtë kohë të pandemisë
”Me këtë rast unë ju dëshiroj sukses të gjitha skuadrave pjesëmarrëse, ju dëshiroj sukses te dyja federatave, por gjithashtu edhe mediumeve të cilat do të bëjnë transmetimin e ndeshjeve të kësaj lige. Sepse, përsëri po e ritheksoj në këtë vit i cili është përshkuar me një krizë të paparë deri tash në botë dhe është përfshirë nga pandemia COVID-19, themelimi apo iniciativa për themelimin e një lige të tillë është një hap shumë i rëndësishëm dhe gjithsesi pozitiv në drejtimin e zhvillimit të basketbollit, qoftë në Kosovë apo në Shqipëri”, thotë Demirel.
Por, cila është rëndësia e themelimit të ”Ligës Unike”, sipas të parit të FIBA Evropës:
”Vendimi i dy federatave të basketbollit të Kosovës dhe Shqipërisë, dy shteteve fqinje është një vendim jashtëzakonisht i mirë dhe i rëndësishëm dhe ne si FIBA Evropë e kemi përkrahur dhe qëndrojmë prapa saj, sidomos në kohën e pandemisë. Për këtë unë i përgëzoj kryetarët e FSHB-së dhe FBK-së, z.Ponarin dhe z.Fetahun. Poashtu është shumë e rëndësishme që dy ministret e Sportit të Shqipërisë dhe Kosovës, janë prezente në këtë ceremoni të nënshkrimit dhe kanë dhënë përkrahjen dhe mbështetjen për themelimin e kësaj lige, gjë e cila tregon për përkrahjen dhe interesimin e dy qeverive të dy shteteve. Dhe ajo që është më e rëndësishme, shpresoj që themelimi i kësaj lige do të jetë i suksesshëm edhe në aspektin e garave dhe do të jetë një model i mirë edhe per raste tjera të shteteve fqinje në Ballkan për themelimin e ligave të përbashkëta të basketbollit, gjë e cila do të ndikojë në ngritjen, kualitetin dhe zhvillimin e basketbollit në rajon dhe më gjerë.
Pra shikuar në përgjithësi në emër të basketbollit të Kosovës dhe Shqipërisë, por edhe basketbollit evropian, kjo është një ngjarje jashtëzakonisht e rëndësishme dhe shpresojmë një shembull i mirë edhe për federatat tjera nacionale në Evropë”, deklaroi, kreu i FIBA Evropës.
/AsistiOnline.com/
Komentet janë të mbyllura.