RAHOVECI E NISË STINORIN ME FITORE TË THELLË NDAJ VËLLAZNIMIT

Prishtinë(AsistiOnline) – Rahoveci e ka nisur me fitore të thellë, stinorin e ri në elitën e basketbollit të Kosovës.

‘Vreshtarët’ kanë triumfuar si vendas në ”Mizahir Isma”, ndaj skuadrës së promovuar sivjet në Superligë me rezultat të përgjithshëm prej, 88-65.

Ishte skuadra e Rahovecit, ajo që e kishte rezultatin nën-kontroll nga fillimi e deri në fund(20-13, 25-9, 21-16, 22-27), për t’ju gëzuar fitores në fund me plotë meritë. Në anën tjetër, Vëllaznimi e nisi me humbje të merituar stinorin e Superligës, ku u pa dukshëm mungesa e lojtarëve cilësorë vendorë dhe gjakovarët duhet të punojnë shumë, nëse duan të mbeten në elitë.

Katër lojtarë arritën pikë dyshifrore në fitoren e Rahovecit sonte, Marvin Jones shkëlqeu me plotë 38 pikë, 6 kërcime, 8 asiste e 3 vjedhje topash, Edmond Kryeziu me 15 pikë dhe Amadi Ikpeze e Bardhi Rexha me nga 12 pikë.

Tek Vëllaznimi s’mjaftuan për fitore dy transferet e huaja, Chris Hortman me 20 pikë e Cedric Council me 18 sosh.

Rahoveci në xhiron e ardhshme i shkon Pejës e Vëllaznimi e pret Ponte Prizrenin.

/AsistiOnline.com/