SONTE DERBI I VJETËR, QË PRITET TË RIKTHEJË RIVALITETIN E DIKURSHËM

Prishtinë(AsistiOnline) – Xhiro e parë e Superligës së Kosovës, mbyllet sonte në Prizren me një ndeshje tepër interesante mes dy skuadrave që gjithmonë kanë prodhuar rivalitet.

Në ”Sezai Surroi” të Prizrenit, takohen dy rivalët e vjetër, Bashkimi – Trepça, që pritet të jetë sfidë tejet interesante, duke shtuar faktin se Trepça sivjet është bërë me kryesi të re dhe po synon të rrisë kualitetin e basketbollit mitrovicas.

Bashkimi ishte finalist i Superkupës ku u mposht nga Sigal Prishtina, por tregoi se ka ekip për suksese. Kurse mitrovicasit siguruan mbijetesën në elitë, duke mundur AS Prishtinën në Play-out dhe shpresojnë se do të kenë një edicion më të suksesshëm se ai i kaluari, falë edhe riorganizimit më të mirë të ekipit.

Takimi do të zhvillohet pa shikues dhe me praninë e vetëm 50 personave në palestër, duke përfshirë dy skuadrat, zyrtarët e ndeshjes dhe përfaqësuesit e FBK-së, si pasojë e masave anti-covid-19.

Ndeshja do të transmetohet në platformën ArtMotion, kurse rezultatin LIVE pas çdo çereku, por edhe raportin final të ndeshjes, mund ta gjeni në portalin ekskluziv-basketbollistik, AsistiOnline.com

Superliga – Java 1

E enjte

19:30 Bashkimi – Trepça

/AsistiOnline.com/