MARMARINOS ZGJEDH TË NATYRALIZUARIN PËR NDESHJET E SHKURTIT

Prishtinë(AsistiOnline) – Pas një javë e gjysmë, Përfaqësuesja e Kosovës A, do ti zhvillojë dy takimet e fundit në tentim për të kaluar në kualifikimet për Botërorin 2023.

Siç ka mësuar AsistiOnline.com, selektori i Kosovës, Christos Marmarinos e ka përzgjedhur edhe basketbollistin e natyralizuar nga Kosova i cili do ti mbrojë ngjyrat e Reprezentacionit tonë në këto dy sfida shumë të vlefshme.

Fundori amerikano-kosovar, Divine Myles i cili njëkohësisht luan edhe për skuadrën e Ponte Prizrenit, do të jetë pjesë e ekipit të Kosovës në këto dy takime shumë të rëndësishme.

Të kujtojmë se natyralizimi i Mylesit te Kosova ishte bërë në vitin 2019 me kërkesën e ish-përzgjedhësit, Damir Mullaomeroviq për ndeshjet e raundit të parakualifikimeve për “Eurobasket 2021” atë kohë.

Kosova A më 18 Shkurt do të ballafaqohet me Luksemburgun, kurse më 20 Shkurt me Sllovakinë. Të dy ndeshjet do të zhvillohen në Prishtinë dhe të cilat janë të vlefshme për Grupin B parakualifikues për Botërorin 2023.

/AsistiOnline.com/