YLLI FITON NË PRIZREN DHE THELLON KRIZËN E BASHKIMIT

Prishtinë(AsistiOnline) – Golden Eagle Ylli është rikthyer te fitoret në Superligën e Kosovës, duke triumfuar sonte në Prizren.

Therandasit kanë arritur të mposhtin Bashkimin me shumë meritë dhe me rezultat final, 66-81.

Pjesa e parë e ndeshjes ishte më e baraspeshuar me Yllin që e fitoi çerekun e parë, 13-19, ndërsa i dyti i takoi ngushtë Bashkimit, 25-23 dhe mysafirët shkuan në avantazh me 4 pikë dallim(38-42).

Në pjesën e dytë, Ylli u tregua më i vëmendshëm se vendasit, duke fituar dy periodat vendimtare të ndeshjes(17-20, 11-19) të cilat i shërbyen për ta fituar krejtë ndeshjen.

Katër basketbollistë arritën pikë dyshifrore në fitoren e Yllit sonte: Mitchell Wilbekin e Erjon Kastrati me nga 21 pikë, transferi i ri L.G Gill luajti me 14 pikë e 9 kërcime, si dhe Demetris Morant me double-double(12pk, 10krc).

Te Bashkimi s’mjaftuan për fitore: Chris Lutete me 27 pikë e as Obinna Oleka me double-double(13pk, 13krc).

Pas këtij triumfi, Ylli pozicionohet i pari përkohësisht me 38 pikë, 15 fitore e 8 humbje. Ndërsa, Bashkimi mbetet i 5-ti me 33 pikë, 10 fitore e 13 humbje.

Në xhiron e radhës, Ylli e pret Trepçën e Bashkimi takohet me Vëllaznimin.

/AsistiOnline.com/