SONTE NDESHJA E PARË E FINALES SË MADHE, PEJA – YLLI

Prishtinë(AsistiOnline) – Sonte zhvillohet ndeshja e parë e serisë finale të Superligës së Kosovës, ndërmjet Pejës dhe Golden Eagle Yllit.

Peja në çerekfinale kishte mundur Sigal Prishtinën 2:1, derisa në gjysmëfinale u përballë me Ponte Prizrenin, ku kaluan në finale me serinë 3:2, pasi takimi i fundit ishte ndërprerë pas pjesës së parë dhe u takoi pejanëve me rezultat zyrtar 20:0.

Golden Eagle Ylli në çerekfinale eliminoi Bashkimin 2:1, edhe pse humbi sfidën e parë, ndërsa në gjysmëfinale pas pesë sfidave shumë interesante eliminoi Rahovecin 3:2.

Në këtë seri finale, Peja do ta ketë avantazhin e terenit vendas për faktin se në gjysmëfinale e mposhti liderin e stinorit të rregullt, Ponte Prizrenin. Ndërsa në këtë seri, skuadra që shënon tri fitore do të shpallet kampione e Kosovës.

Ndeshja e sontme fillon nga ora 20:15 dhe transmetohet direkt në ArtMotion e si zakonisht rezultatin pas çdo çereku, por edhe raportin final të ndeshjes do të mund ti gjeni në portalin e vetëm shqiptar, dedikuar ekskluzivisht basketbollit – AsistiOnline.com

/AsistiOnline.com/