I LUMTUR ME ÇMIMIN: TOM THIBODEAU TRAJNERI I VITIT NË NBA!

Prishtinë(AsistiOnline) – Amerikani, Tom Thibodeau është shpallur trajneri më i miri i stinorit në NBA.

Trajneri i New York Knicks e mori sivjet drejtimin e skuadrës ”njujorkeze” dhe arriti që pas shtatë stinorëve ta rikthejë këtë klub në plejof.

Kjo është hera e dytë që ky çmim i shkon ekspertit me përvojë të madhe, pas atij të fituar në sezonin 2010/2011 kur Tom drejtonte Chicago Bullsat.

Gjatë pjesës së rregullt të sezonit, ekipi nga ”Madison Square Garden” regjistroi rezultatin e 41 fitoreve dhe 31 humbjeve, e cila ishte e mjaftueshme për vendin e katërt në Lindje.

Edhe pse më në fund arritën në plejof, ata nuk qëndruan në të për shumë kohë, duke marrë parasysh që u ”nokautuan” nga Atlanta në raundin e parë.

Kontributi i veçantë i ish-strategut të Çikagos dhe Minesotës u ndie sidomos në mbrojtje.

Ky nuk është çmimi i parë për Knicks në këtë stinor, duke pasur parasysh se Julius Randle më parë mori çmimin për lojtarin që bëri më së shumti përparim këtë vit në NBA.

Çmimi për trajnerin e vitit në NBA, është dhënë që nga sezoni 1962/63 dhe deri më tani ai është fituar më së shumti herë nga Pat Riley, Greg Popovic dhe Don Nelson, nga tre herë secili.

/AsistiOnline.com/