EKSKLUZIVE: FOTIS TAKIANOS PO RIKTHEHET TE RAHOVECI!

Prishtinë(AsistiOnline) – Pas një pushimi tejet të zgjatur, duket se edhe skuadra e Rahovecit ka filluar të lëvizë në organizim për edicionin e ri.

AsistiOnline.com ka arritur të mësojë ekskluzivisht se ‘vreshtarët’ tashmë kanë kompletuar marrëveshjen për ta rikthyer në skuadër teknikun grek, Fotis Takianos.

Në njërën prej episodeve të ASISTIT, kreu i KB Rahovecit, Alban Rama kishte thënë se Rahoveci pritet të vazhdojë bashkëpunimin me trajnerin nga edicioni i fundit dhe ashtu si duket edhe do të ndodhë.

Burime të afërta dhe mirë-informuara me klubin e Rahovecit i kanë thënë AsistitOnline, se Takianos e ka pranuar ofertën e ”vreshtarëve”, derisa po të njëjtat burime kanë theksuar se ‘timonieri’ grek pritet që të krijojë ekipin e Rahovecit, pra mund të ketë dorë të lirë në transfere.

Klubi nga qyteti i ‘vreshtave’ që viteve të fundit ka qenë prej klubeve më të organizuara në Kosovë, ende nuk e ka zyrtarizuar ndonjë risi për edicionin e ri, por që këtë pritet ta bëjë publike shumë shpejtë.

Si zakonisht, AsistiOnline.com do t’ju mbajë të informuar në kohë reale, për gjithçka që ndodhë në merkaton e basketbollit kosovar, andaj qëndroni me ne.

/AsistiOnline.com/