SHQIPTARJA E VETME QË U PARAQIT ME MAQEDONINË NË EVROPIAN

nga Asisti Online në 02/08/2021

Prishtinë(AsistiOnline) – Në mesin e basketbollisteve më premtuese në Maqedoninë e Veriut me gjeneratën U18, është edhe një shqiptare që vlerësohet shumë.

Bëhet fjalë për Rina Saliun e cila ishte shqiptarja e vetme e ftuar në Maqedoninë e Veriut për European Challengersin që u mbajt në Sofje të Bullgarisë prej 27 korrik e deri më 1 gusht.

Në këtë turne, Maqedonia e Veriut u rangua si e katërta me 3 humbje dhe 2 fitore. Derisa pati përballë edhe Kombëtaren e Shqipërisë ndaj të cilës triumfoi.

Në një prononcim për AsistiOnline.com, basketbollistja e talentuar shqiptare rrëfehet për fillimet e saj me basketbollin, ftesën nga Maqedonia dhe ekpseriencën me këtë ekip, rrjedhën deri te sukseset e deri te tregimi nëse ka pasur ftesë nga Kosova.

”Unë merrem me basketbollin në më shumë se 4 vite dhe luaj te skuadra shqiptare e Shkupit. Për me qenë pjesë e reprezentacionit jo vetëm të Maqedonisë por të çdo shteti, duhet pasur vullnet për punë të madhe dhe mendoj se çdo basketbolliste e ka ëndërr të luaj për shtetin e vet, ashtu siç ka qenë ëndërr për mua e cila edhe mu realizua”, thotë Saliu.

Tutje ajo tregon për Kombëtare e Maqedonisë së Veriut me të cilën u paraqit në European Challengers U18 Women’s.

”Me reprezentacionin e Maqedonisë U18, kemi pasur kampionatin prej 27 korrikut deri më 1 gusht dhe ka qenë një eksperiencë e tillë që s’mund të harrohet, sepse gjatë gjithë përgatitjeve poashtu edhe lojërave çdo lojtare mëson shumë rreth basketbollit si dhe krijon shoqëri të reja. Mendoj se jo vetëm unë, por të gjithë jemi të kënaqur me rezultatin që kemi arritur ku morëm vendin e 4-të në tabelë. Kemi pasur pesë ndeshje me Ukrainën, Slloveninë, Bullgarinë, Shqipërinë dhe Zvicrrën. Fitore kemi arritur ndaj Shqipërisë dhe Zvicrrës, ku në ndeshjen e fundit me Zvicrrën kemi fituar me 1 pikë dallim.

Realisht ky Evropian ishte një përvojë dhe mësim shumë i mirë dhe mendoj se do të arrijmë edhe shumë suksese të tjera, jo vetëm unë, por edhe komplet ekipi i vajzave sepse besoj që kemi kapacitete që të ecim përpara”, thotë 18 vjeçarja nga Kumanova.

Rina aktualisht është e vetmja shqiptare në reprezentacionin e Maqedonisë, por gjithashtu edhe ndër shqiptaret e tjera që merren me sporte të ndryshme dhe kjo sigurisht është një pjesë e veçantisë që e karakterizon atë.

Por si e sheh ajo të ardhmen e saj, a do të ndërrojë ambient në nivel klubesh dhe a ka pasur ftesë nga Kosova, tregon ajo në fund të prononcimit.

”Për momentin ende nuk e di nëse do të ndërrojë klub apo jo po, do ia lëmë kohës sepse vetëm sa e përfunduam Evropianin dhe jemi duke pushuar pak. Sa i përket Kosovës, kam pasur ftesë edhe për reprezentacionin e atjeshëm, por shkaku i dokumenacionit nuk munda që ti bashkohem ekipit, por për vitet e ardhshme me shumë dëshirë do të luaja”, përfundoi bisedën basketbollistja shqiptare.

/AsistiOnline.com/