TREPÇA SHKËLQEN DHE FITON NDAJ RAHOVECIT TË Ç’ORIENTUAR

Prishtinë(AsistiOnline) – Trepça e ka fituar më lehtë se që është pritur njërën prej përballjeve kryesore të xhiros së shtatë në ArtMotion Superligën e Kosovës.

Mitrovicasit me lehtësi e kanë demoluar sonte Rahovecin në ”Mizahir Isma” me rezultat tejet të thellë 75-103.

Që nga fillimi e deri në fund Trepça sonte e kontrolloi ndeshjen, duke krijuar epërsi të thellë sidomos pas tri periodave të para(19-31, 17-26, 20-29), derisa të fundin e fitoi ngushtë Rahoveci(19-17), por që nuk luajti fare rol.

Komplet pesëshja startuese e mitrovicasve sonte realizoi pikë dyshifrore, Drilon Hajrizi(24), Ty Cockfield(20), Amin Hot(19), Andrew Gordon(15),Samir Zekiqi(13).

Te Rahoveci me lojë të mirë u dalluan, Nick Banyard me 21 pikë, Altin Morina me 16, Musab Mala me 13 e Milik Yarbrough me 10 sosh.

Trepça me këtë fitore u rikthye në krye të renditjes tabelare, derisa Rahoveci mbetet i parafundit.

Në xhiron e rradhës, mitrovicasit takohen me Yllin në Therandë e Rahoveci luan ndaj Prizrenit 16.

/AsistiOnline.com/