PËRBALLJA E VITIT? YLLI FITON PAS DY VAZHDIMEVE NDAJ PEJËS!

Prishtinë(AsistiOnline) – Golden Eagle Ylli e ka fituar super-përballjen e Ligës Unike ndaj Pejës pas dy palë vazhdimeve.

Therandasit kanë triumfuar ndaj Pejës me rezultat maksimalisht të ngushtë 93-92.

Peja e nisi më mirë këtë super-sfidë, duke fituar çerekun e parë 15-20, derisa i dyti i takoi Yllit(19-11) që u rikthye në lojë dhe shkoi në pushim me 3 pikë avantazh 34-31.

Në pjesën e dytë vazhdoi loja e fortë mes skuadrave, me Yllin që e fitoi ngushtë çerekun e tretë 22-19, Peja në periodën e katërt ishte afër fitores dhe fitoi çerekun e katërt 15-21, por kjo nuk mjaftoi pasiqë me treshen e Gëzim Morinës 2 sekonda para fundit ndeshja shkoi në vazhdime.

Dramë e madhe e shoqëroi super-ndeshjen edhe në vazhdimin e parë, ku me treshen e Sami Hajzerit ende pa u inkuadruar mirë nga banka rezervë ai lansoi dhe qëlloi treshe për ta dërguar super-duelin në vazhdimin e dytë 84-84. Derisa në 5 minutëshin e fundit të kësaj super-ndeshje maratonike, Ylli u tregua për vetëm një pikë më i saktë dhe fitoi ndeshjen 93-92.

Në këtë fitore të madhe të Yllit, individët më të dalluar sonte ishin, Erjon Kastrati me 31 pikë, 6 asiste, 5 kërcime e 3 vjedhje topash, Brandon Randolph me 19 pikë, 9 kërcime, 6 asiste e 2 vjedhje topash, si dhe Mikaile Tmusiq, Cameron Williams e Barret Benson me nga 12 pikë secili.

Te Peja nuk mjaftuan assesi për fitore, Erdem Ilter me 29 pikë, Henrik Shirko me 23 pikë e Stephen Maxwell me 20 pikë e 11 kërcime.

Vlen të ceket se ky duel do të jetë i vlefshëm edhe për Superligën e Kosovës.

Pas xhiros së dytë në Ligën Unike, Ylli i prin renditjes tabelare së bashku me Kamzën, duke pasur 2 fitore nga 2 ndeshje të luajtura. Derisa, Peja tash ka 1 fitore e 1 humbje.

Në xhiron e rradhës, Ylli i shkon Teutës e Peja e pret Kamzën.

/AsistiOnline.com/