YLLI TRIUMFON NË DERBIN DRAMATIK NDAJ RAHOVECIT

Prishtinë(AsistiOnline) – Golden Eagle Ylli e ka mposhtur Rahovecin në njërën prej ndeshjeve më interesante të xhiros së katërt në Ligën Unike.

Therandasit kanë triumfuar në ”Mizahir Isma” me rezultat të ngushtë dhe final 72-77.

Ndeshja nisi shumë ngushtë me çerekun e parë që u mbyll baraz 16-16, derisa në të dytin triumfoi Ylli 18-25 dhe shkoi në pushim me epërsi 7 pikëshe(34-41).

Në pjesën e dytë, vazhdoi loja e ngushtë me Yllin që e fitoi çerekun e tretë 21-24, derisa periudha e fundit i takoi Rahovecit 17-12, por që nuk mjaftoi për fitore dhe triumfit me meritë sonte iu gëzua Ylli.

Tre lojtarë arritën pikë dyshifrore në fitoren e Yllit sonte, Brandon Randolph(23), Erjon Kastrati(20) e Barret Benson(16).

Te Rahoveci nuk mjaftuan për fitore, Milik Yarbrough me 20 pikë e Musab Mala me 15 sosh.

Pas xhiros së katërt në Ligën Unike, Ylli tash ka 3 fitore e 1 humbje, derisa Rahoveci sonte pësoi disfatën e katërt rresht në këtë garë dhe ende nuk ka shënuar fitore.

Në xhiron e ardhshme, Rahoveci i shkon Vllaznisë e Ylli e pret Kamzën.

/AsistiOnline.com/