PRISHTINA FITON THELLË DERBIN NDAJ TREPÇËS

Prishtinë(AsistiOnline) – Sigal Prishtina e ka fituar përballjen kryesore të xhiros 13 në ArtMotion Superligën e Kosovës.

Kryeqytetasit kanë triumfuar në shtëpi ndaj mitrovicasve me rezultatin e thellë 82-65.

Që në start vendasit e nisën më mirë duelin, duke e mbyllur çerekun e parë në avantazh(21-13), derisa në të dytin ekipet u ndan baraz(24-24) dhe vendasit shkuan në pushim me avantazhin 45-37.

Në pjesën e dytë kur pritej ndonjë rikthim i Trepçës, Prishtina veçse u konsolidua më shumë dhe fitoi çerekun e tretë(20-10), derisa i katërti u luajt ngushtë(17-18), por që s’ndikoi fare në epilogun e ndeshjes e Prishtina triumfoi me meritë.

Lejson Zeqiri ishte fantastik te Prishtina sonte me 20 pikë, 5 kërcime e 3 asiste, Biram Faye shtoi 16 pikë e Muhamedali Janjeva realizoi double-double(11pk, 10krc).

Te Trepça pikë dyshifrore arritën, Ty Cockfield(15), Drilon Hajrizi(13), Andrew Gordon(11) e Amin Hot(10).

Momentalisht, Prishtina ka 7 fitore e 6 humbje në elitën kosovare dhe me 20 pikë renditet e 4-ta. Derisa, Trepça mbetet e 2-ta me 22 pikë, 9 fitore e 4 humbje.

Në xhiron e ardhshme, Prishtina i shkon Prizrenit 16 e Trepça e pret Rahovecin.

/AsistiOnline.com/