PRIZRENI 16 E FITON ÇEREKFINALEN E PARË NDAJ RAHOVECIT

Prishtinë(AsistiOnline) – Dueli i parë i serisë çerekfinale ndërmjet Rahovecit dhe Prizrenit 16 i ka takuar këtij të fundit sonte në ”Mizahir Isma”.

Në një sfidë spektakolare dhe me shumë kthesa, bardhezinjët nga Prizreni triumfuan me rezultatin e ngushtë 93-98.

Rrjedha e ndeshjes ishte tejet interesante me Rahovecin që i fitoi dy periodat e para ngushtë (28-22, 23-20) dhe shkoi në pushimin mes pjesëve me rezultatin 51-42.

Në pjesën e dytë, Prizreni 16 u këndell dhe arriti që fillimisht të fitojë çerekun e tretë (22-27) e krejt në fund e fitoi edhe periodën vendimtare dhe të fundit (20-29) e cila i solli fitoren e madhe.

Arti Hajdari ishte individi më i dalluar te Prizreni 16 sonte me 27 pikë, derisa ndihmë mori edhe nga Darell Davis me 23 pikë, 12 kërcime e 9 asiste, Robert McCoy që shtoi 20 pikë e 10 kërcime dhe Xavier Cannefax që kishte 14 pikë e 11 asiste.

Prizreni 16 e fitoi duelin e parë çerekfinal, derisa në duelin kthyes Rahoveci duhet të fitojë me 6 pikë diferencë nëse e dëshiron kalimin në gjysmëfinale të Ligës Unike.

/AsistiOnline.com/