DALLASI E TRONDIT PHOENIX SUNSIN DHE KUALIFIKONET NË FINALE TË PERËNDIMIT

Prishtinë(AsistiOnline) – Skuadra simpatike e Dallas Mavericks lirisht mund të themi se e ka shkaktuar një befasi senzacionale në ”play off” të NBA-së sivjet.

Mavs të drejtuar nga trajneri karizmatik, Jason Kidd, arritën që ta mposhtin favoritin për titull sivjet, Phoenix Sunsin në duelin vendimtar të serisë gjysmëfinale me shifrat 90-123.

Pothuajse si zakonisht, Luka Doncic ishte njeriu kryesor edhe në këtë fitore vendimtare të Dallasit me 35 pikë, 10 kërcime e 4 asiste, derisa u ndihmua fuqishëm edhe nga Spencer Dinwiddie me 30 pikë e Jalen Brunson me 24 pikë.

Te Suns në këtë duel, Cameron Johnson kishte 12 pikë e Devin Booker shtoi 11 sosh.

Me këtë triumf madhor dhe seri të përgjithshme prej 4-3, Dallas Mavericks kaloi në finale të Konferencës Perëndimore në NBA, atje ku do të ndeshet me Golden State Warriors.

Dueli i parë i kësaj serie zhvillohet me 19 maj në ”Chase Center” të San Franciscos.

/AsistiOnline.com/