6 TRAJNERË SHQIPTARË E PËRFUNDOJNË ME SUKSES, SEMINARIN KU LIGJËRUAN TRAJNERËT E EUROLIGËS

Prishtinë(AsistiOnline) – Një verë e suksesshme mund të llogaritet kjo për disa trajnerë shqiptarë që sivjet patën fatin të pajisen me diploma në seminar ku ligjëruan trajnerët e Euroligës.

Bëhet fjalë për akademinë prestigjioze të themeluar nga të gjithë trajnerët e Euroligës me emrin ”EHCB” e cila shërben si shkollë e lartë për trajnerë ku seminaret, ligjërimet e praktikat, zgjasin 10 muaj për të marrë diplomën e cila përfundon me kongresin ku ligjërojnë trajnerët të Euroligës.

Njëri prej ish-basketbollistëve më të mirë shqiptarë në histori dhe tash trajner me shumë perspektivë, Muhammed-Muja Thaçi ishte i pari nga trajnerët shqiptarë që sivjet u pajis me këtë diplomë. Madje, Muja të gjitha trajnimet, ligjëratat dhe gjërat e tjera i përcolli nga afër dhe ishte i pranishëm fizikisht në këtë seminar, së bashku edhe me trajnerin tjetër të ri në moshë nga Shkupi, Erkam Ismaili.

E me sukses këtë seminar e ndoqën online dhe u pajisën me diploma edhe trajnerët kosovarë: Andin Rashica, Dritëro Sefaja e Driton Puka.

Nga basketbolli i Shqipërisë, AsistiOnline.com ka informacione për Afrim Bilallin, ndërsa për trajnerë të tjerë nuk kemi ndonjë informatë se janë pajisur me diplomë të tillë.

/AsistiOnline.com/