EKSKLUZIVE: NGA OLYMPIACOS TE PENZA, TOLEFREE RIKTHEHET NË BASKETBOLLIN KOSOVAR

Prishtinë(AsistiOnline) – Përpos elitës së meshkujve, sivjet një sezon tepër interesant na pret edhe në basketbollin femëror në Kosovë.

Me Bashkimin e Prizrenit që tashmë ka kompletuar rosterin me vendore dhe të huaja, është edhe kampionia aktuale e Kosovës, Penza që po e kompleton rosterin.

Drejtuesit e klubit pejan siç ka mësuar ekskluzivisht AsistiOnline.com, janë afër marrëveshjes me reprezentuesen e natyralizuar të Kosovës, Alexis Tolefree.

Plejmejkerja amerikane së fundmi ka qenë pjesë e gjigantit grek, Olimpiakos me të cilët fitoi titullin e Greqisë dhe luajti me mesatare prej 10.8 pikëve, 2.7 asiste e 1.7 kërcime për ndeshje.

Tolefree para dy viteve ishte pjesë e KBF Prishtinës, gjersa vitin e kaluar me Përfaqësuesen e Kosovës A, kishte zënë vendin e tretë në Kampionatin Evropian për shtetet e vogla.

Penza deri tani ka konfirmuar transferimet e dy lojtareve të huaja, gjersa nga vendoret nuk ka zyrtarizuar ndonjë transfer ende.

/AsistiOnline.com/