REA UKAJ – BASKETBOLLISTJA E TALENTUAR PEJANE, TRANSFEROHET NË SHBA

Prishtinë(AsistiOnline) – Një tjetër basketbolliste premtuese po e lë Kosovën për të realizuar ëndrrën e saj që të luaj në vendin më të zhvilluar për basketboll.

Rea Ukaj, basketbollistja e re dhe talentuar nga Peja ka fituar një bursë të majme në një shkollë të mesme mjaftë serioze në New York, ku do të transferohet për të jetësuar synimet.

18 vjeçarja e gjatë 182 centimetra, nga ky shtator do të bartet në ekipin e ”New York Military Academy (NYMA)”, atje ku do të shkollohet dhe të luajë basketboll njëkohësisht.

Deri sivjet, Rea ishte pjesë e Penzës në Superligën e Kosovës te femrat, gjersa me licencë të dyfishtë luajti edhe te Peja 03 dhe Istogu në Ligën e parë, ku tregoi lojëra fantastike.

Lojtarja premtuese nga Peja, sivjet ishte edhe pjesë e Përfaqësueses U20 te femrat, gjersa shihet prej shpresave të Kosovës A.

Të kujtojmë se Rea është e bija e ish-basketbollistit të njohur pejan, Milaim Ukaj dhe motër e basketbollistit Rron Ukaj i cili prej vitesh po luan në SHBA.

/AsistiOnline.com/