Zyrtare: Edon Maxhuni transferohet te skuadra e njohur elitare gjermane

Prishtinë(AsistiOnline) – Edon Maxhuni është bërë me skuadër të re për edicionin e ri të garave që pritet të nis për pak ditë.

Njëri prej basketbollistëve më të mirë shqiptarë në botë aktualisht, është zyrtarizuar çaste më parë në radhët e skuadrës nga elita gjermane-BBL, ”Crailsheim Merlins”.

Skuadra në fjalë njihet prej ekipeve më serioze në vitet e fundit në basketbollin gjerman, derisa stinorin e kaluar për vetëm një pozitë s’kishte mundur të arrijë ”play off”-in dhe përfundoi edicionin në pozitën e 9-të.

”Edoni do të na japë mundësi shtesë në pozicionin e rindërtimit të ekipit. Jemi të kënaqur që angazhimi ynë për ta pasur në ekip, funksionoi kaq shpejtë. Ai vjen tek ne në gjendje të mirë fizike, ku ka bërë paraqitje shumë të mira me Finlandën në Kampionatin Evropian. Jemi të lumtur që Edoni është me ne tani”, tha drejtori sportiv i ekipit, Ingo Enskat, transmeton AsistiOnline.com

Edoni në stinorin e kaluar u paraqit me ekipin holandez, Heroes Den Bosch me të cilët fitoi titullin e kampionit të këtij shteti dhe shkëlqeu me mesatare prej, 13.8 pikë, 5 asiste e 2.3 kërcime për ndeshje.

24 vjeçari para pak ditëve e mbylli Eurobasketin 2022 me Kombëtaren e Finlandës, ku ishte njëri nga top-3 lojtarët kryesorë të skuadrës e cila arriti për herë të parë në çerekfinale të një Kampionati Evropian.

/AsistiOnline.com/