Bashkimi e mposht Rahovecin me shumë telashe

Prishtinë(AsistiOnline) – Ndeshja e parë e xhiros së katërt mes Bashkimit dhe Rahovecit, është mbyllur me fitoren e ekipit vendas.

Prizrenasit kanë triumfuar sonte ndaj Rahovecit me tejet vështirësi dhe rezultat final 84-79.

Rrjedha e ndeshjes ishte tejet interesante me mysafirët që fituan dy periodat e para (20-22, 16-21) dhe shkuan në pushim mes pjesëve me avantazh (36-43).

Në pjesën e dytë, Bashkimi u këndell duke fituar thellë çerekun e tretë (30-14) dhe kjo ishte perioda që i solli fitoren ekipit prizrenas, me Rahovecin që e fitoi edhe çerekun e katërt (18-22), por rënia e madhe në çerekun e tretë ndikoi në humbjen e ‘vreshtarëve’.

Altin Morina me 22 pikë, C.J Keyser me 17, Daniel Lekndreaj me 15 dhe e Fahro Alihoxhiq me 11 sosh, ishin katërshja që realizuan pikë dyshifrore te Bashkimi sonte.

Gjersa te Rahoveci nuk mjaftuan kurrsesi për fitore, Musab Mala me 18 e Jahii Carson me 16 pikë.

Pas xhiros së katërt, Bashkimi ka 2 fitore dhe 2 humbje, ndërsa Rahoveci pësoi humbjen e tretë, karshi 1 fitoreje.

Në xhiron e pestë, Bashkimi i shkon Prishtinës e Rahoveci luan ndaj Ponte Prizrenit.

/AsistiOnline.com/