Prishtina arrin fitore dramatike ndaj Ponte Prizrenit, vazhdon forma pozitive

Prishtinë(AsistiOnline) – Sigal Prishtina e ka fituar duelin tejet dramatik ndaj Ponte Prizrenit në ndeshjen hapëse të xhiros së 14-të në elitën kosovare.

Ekipi prishtinas triumfoi në udhëtim te skuadra e Arbnor Rifatit me rezultat 71-77.

Ndeshja nisi pak më mirë për vendasit që fituan periodën e parë 22-19, prishtina u kundërpërgjigj në çerekun e dytë duke e fituar atë në formë solide 17-21 dhe pjesa e parë u mbyll me rezultat minimal 39-40 në favorin e prishtinasve.

Ponte Prizreni e nisi më mirë pjesën e dytë, duke e fituar çerekun e tretë 18-15, megjithatë, Prishtina përsëri u rikthye në lojë, për ta fituar periodën vendimtare të ndeshjes 14-22 e cila i solli fitoren e radhës.

Dy amerikanët, Dustin Thomas me 21 e Derrick Wilson me 20 pikë, ishin dyshja më konkrete e prishtinasve në këtë fitore, gjersa kontribut të çmuar dha edhe Jetmir Zeqiri me 10 pikë.

Te Ponte Prizreni, Dachon Burke ishte fenomenal ndaj ish-ekipit me 32 pikë, 9 kërcime, 5 kërcime e 4 vjedhje topash, por që ishte i pamjaftueshëm për fitore.

Ishte kjo fitorja e 10-të sezonale e Prishtinës, karshi 4 humbjeve, gjersa Ponte Prizreni pësoi sonte disfatën e 7-të, karshi 6 fitoreve.

Vlen të ceket se sivjet, Prishtina ka bilanc të qind për qind ndaj Ponte Prizrenit me 3 fitore nga 3 ndeshje, 2 në elitë e 1 në Superkupë.

Në xhiron e radhës, Sigal Prishtina e luan derbin e javës ndaj Pejës e Ponte Prizreni i shkon në udhëtimin e vështirë, Trepçës.

/AsistiOnline.com/