Sigal Prishtina në super-formë, arrin fitore të thellë edhe ndaj Trepçës në ”Minatori”

Prishtinë(AsistiOnline) – Sigal Prishtina e ka arritur edhe një fitore të thellë në elitën e basketbollit kosovar brenda një jave, vetëm se kësaj radhe si mysafire.

Ekipi kryeqytetas sonte triumfoi në ”Minatori” të Mitrovicë ndaj Trepçës me rezultat 53-88.

Edhe pse u cilësua si derbi i xhiros në letër, kjo nuk ndodhi ngase prishtinasit e dominuan tërë takimin duke i fituar pothujase të gjitha periodat e ndeshjes (9-21, 16-25, 11-29), gjersa ajo e fundit i takoi ekipit vendas (17-13), por që ishte vetëm revyale, pasiqë Prishtina veçse e kishte siguruar fitoren.

Basketbollistët më të dalluar te Prishtina në këtë super-fitore, sonte ishin: Derrick Wilson, Dardan Berisha e Brooks Debisschop me nga 15 pikë secili, si dhe Dustin Thomas që shtoi edhe 11 të tjera.

Te Trepça, Drilon Hajrizi me 19 pikë e transferi i ri Will Daniels që debutoi me 10 pikë.

Pas 18 xhirove, Prishtina ka 13 fitore e 5 humbje, ndërsa Trepça ka 9 fitore e 9 humbje.

Në xhiron e ardhshme, Prishtina e pret Bashkimin e Trepça i shkon Pejës.

/AsistiOnline.com/