FBK e vendos përfundimisht ditën e zhvillimit të ndeshjes së pestë, Prishtina – Trepça
Prishtinë(AsistiOnline) – Federata e Basketbollit të Kosovës e ka vendosur përfundimisht orarin e ndeshjes së pestë të serisë gjysmëfinale, Prishtina – Trepça.
Sipas kumtesës zyrtare të lëshuar para pak minutash, ndeshja do të zhvillohet ditën e dielë, derisa ora e saktë ende nuk është përcaktuar.
Kumtesa e plotë dhe pa ndërhyrje e FBK-së:
Komisioni i Garave i Federatës së Basketbollit të Kosovës (FBK) sqaron për të gjitha palët që termini i ndeshjes, sipas Propozicioneve të Garave të FBK-së duhet të bëhet i ditur 72 orë para fillimit të ndeshjes. Duke u bazuar në këtë parim, kemi shqyrtuar kërkesën e KB Sigal Prishtina për shtyrje të ndeshjes. Kujtojmë që KB Sigal Prishtina fillimisht ka kërkuar që ndeshja të shtyhet nga termini i paraparë të enjten, në të premten më 28 prill. Sot (e martë, 25 prill) ndërkohë e ka dhënë edhe një datë alternative, për të mërkurën, 26 prill.
Rrjedhimisht, cilido caktim i terminit për datën 26 prill, nuk është as i shqyrtueshëm, meqë afatet e këtilla nuk parashihen në Propozicione të Garave.
Duke u nisur nga situata e krijuar dhe faktet ne vijim:
- Kërkesa e KB Sigal Prishtinës që ndeshja të shtyhet
- Kërkesa e klubeve që ndeshjet e play-offit të zhvillohen me gjyqtarë të huaj
- Mirëkuptimi që ka FBK për ndeshjet ndërkombëtare të FHK-së
- Mungesa e gatishmërisë së KB Trepçës që të zhvillojë ndeshje jashtë termineve të parapara me PG
- Mungesa e gatishmërisë se klubeve që të pajtohen për termin të ndeshjes e shtyrë
- Gatishmëria e FBK-së që të mund të sigurojë gjyqtarë të huaj të dielën, me 30 prill
Komisioni i Garave i FBK-së vendos që ndeshja e pestë gjysmëfinale në serinë KB Sigal Prishtina vs KB Trepça të zhvillohet të dielën, me 30 prill.
Në emër të Komisionit të Garave të FBK-së,
Leart HOXHA
Kryesues
Komentet janë të mbyllura.