Trepça e pandalshme, dërrmon edhe Yllin në Therandë

Prishtinë(AsistiOnline) – Trepça e ka vazhduar formën fantastike në elitën e basketbollit kosovar edhe pas xhiros së 14-të.

Ekipi mitrovicas ka fituar sonte thellë në Therandë ndaj Yllit me rezultat final 61-80.

Vendasit e nisën shumë mirë ndeshjen duke e fituar çerekun e parë (25-16) dhe u mendua se fitorja do të vije lehtë për ta, por ndodhi e kundërta me mobilizimin e madh të Trepçës, fillimisht në çerekun e dytë (6-19) dhe ekipi mitrovicas shkoi në pushim me avantazh 4 pikësh (31-35).

Në pjesën e dytë, dominimi i Trepçës u thella pasi ata fituan dy periodat vendimtare (15-27, 15-18) dhe siguruan fitoren me shumë meritë.

Kevin Bracy-Davis dhe Darnell Edge realizuan nga 17 pikë sonte te Trepça, derisa Drilon Hajrizi e Mikaile Tmusiq shtuan nga 13 sosh e Jordy Tshimanga kishte 10 poashtu.

Te Ylli, Jalen Nesbitt me 23 pikë e Dajuan Graf me 10 sosh, ishin dyshja e vetme që realizuan pikë dyshifrore.

Pas 14 xhirove, Trepça ka 12 fitore e 2 humbje ndërsa Ylli, 8 fitore e 6 humbje.

Në xhiron e ardhshme takohen, Golden Eagle Ylli – Bashkimi e Trepça – Istogu.

/AsistiOnline.com/