Bashkimi rikthen në krye Darko Radulloviqin, afron në staf edhe Bledar Gjeçajn

nga Asisti Online në 05/07/2024

Prishtinë(AsistiOnline) – Maqedonasi Darko Radulloviq është kryetrajner i Bashkimit për edicionin e ri.

Klubi prizrenas ka njoftuar sot se ka arritur marrëveshje me të për edicionin e ri të garave.

”Kemi arritur marrëveshje me trajnerin e mirënjohur maqedonas, Darko Radulović, i cili ishte pjesë e familjes sonë gjatë sezonit 2022/23 ku më pas vazhdoi karrierën në Superligën Hungareze. Gjatë karrierës si trajner në Superligën e Maqedonisë ka fituar Kupën në 2021, është shpallur kampion në 2021 dhe 2023, dhe ka fituar Superkupën në 2022. Së fundmi, ai ishte pjesë e ligës së Maqedonisë me ekipin Pelister, me të cilin arriti në finale”, shkruan njoftimi i klubit portokalli.

Bashkimi e ka shtuar në staf si ndihmës trajner edhe ish-basketbollistin shkodran, Bledar Gjeçaj.

”Ju njoftojmë se Bledar Gjecaj i është shtuar shtabit teknik si ndihmës trajner i skuadrës sonë. Kemi arritur marrëveshje me ish-legjendën e klubit tonë, i cili nga tani do ta marrë përsipër detyrën e ndihmës trajnerit. Ai do të jetë ndihmës shtesë i trajnerit Darko Radulovic për klubin tonë, së bashku me Elbesar Geshtenja. Bledar, të urojmë mirëseardhje dhe të dëshirojmë fat”, shkruan njoftimi tjetër për Gjeçajn.

/AsistiOnline.com/