Transferi i vitit në Ligën e parë, Grapeland arrin marrëveshje me Bardh Rexhën
Prishtinë(AsistiOnline) – Grapeland Basketball vazhdon çdo ditë me prezantimin e ekipit për stinorin që po vjen në Ligën e parë.
Klubi nga Rahoveci sot ka bërë lëvizjen e madhe, duke njoftuar marrëveshjen e madhe me djaloshin e qytetit, Bardh Rexha.
Rexha në të kaluarën ka luajtur me Rahovecin dhe Vëllaznimin, derisa siç mëson AsistiOnline.com ka pasur një interesim dhe insistim të madh nga klubet e Superligës për ta pasur në rradhët e veta, por që Bardhi ka zgjedhur skuadrën e vendlindjes për të synuar rikthimin e Rahovecit në hartën e basketbollit elitar kosovar.
”Grapeland Rahoveci ka kënaqësinë që të prezantojë për edicionin 2024/2025 ikonën absolute të basketbollit të Rahovecit, Bardh Rexha. Bardhi, apo siç e njohim të gjithë, djali i qytetit, përkundër ofertave të shumta nga klubet elitare kosovare, ka vendosur që të vë gjithë kapacitetin e tij në mënyrë që basketbolli i qytetit tonë të kthehet sërish në Superligë. Bëhuni gati për një super sezon miq – dhe bashkë me Bardhin do t’ia dalim drejt synimeve tona – sepse publikun do ta kemi së bashku si bazament të fuqishëm për të arritur synimet e përbashkëta”, shkruan njoftimi i Grapeland.
Bardhi njihet për karakterin e jashtëzakonshëm që posedon, luftën e madhe për top e cila e dallon në veçanti, e transferimi i tij dhe lëvizjet e tjera cilësore tek Grapeland i bën këta të fundit si skuadër favorite për inkuadrim në Superligën e Kosovës. /AsistiOnline.com/
Komentet janë të mbyllura.