Musab Mala lëndohet gjatë stërvitjeve te Kosova

Prishtinë(AsistiOnline) – Përfaqësuesja e Kosovës në basketboll ka mbetur pa një lojtar në grumbullimin e saj për përgatitjet e ndeshjeve të nëntorit.

Bëhet fjalë për Musab Malën, i cili ka pësuar një lëndim në këmbën e tij. E sipas informacioneve të marra nga AsistiOnline.com, bëhet fjalë për një lëndim që megjithëse nuk është shumë i rëndë, mund ta lërë Malën jashtë parketit për disa javë. Statusi i tij pritet të konfirmohet më tej gjatë ditëve në vijim.

Lëndimi do të bëjë që ai të mos mund të ndihmojë Kombëtaren e Kosovës për dy ndeshjet e ardhshme ndaj Zvicrës dhe Irlandës.

Në mes të shqetësimeve për lëndimet, Kombëtarja e Kosovës ka ftuar edhe dy lojtarë të tjerë, Muhamedali Janjevën dhe Drilon Hajrizin, por të dy janë ende në fazën e rikuperimit nga lëndimet e mëparshme. Ndërkohë, nuk pritet që ata të jenë pjesë e ekipit për ndeshjet e ardhshme, edhe pse kjo do të konfirmohet pas disa ditësh, kur gjendja e tyre të bëhet më e qartë.

Kosova do të përballet me Zvicrën dhe Irlandën në kuadër të ndeshjeve parakualifikuese për kampionatin botëror 2027.

/AsistiOnline.com/