Lideri i Ligës së parë, Grapeland prezanton transferimin e ri të huaj

Prishtinë(AsistiOnline) – Skuadra e Grapeland Rahovecit ka njoftuar sot se ka siguruar një përforcim të rëndësishëm për këtë sezon, duke transferuar amerikanin Khari Broadway, një lojtar i talentuar që do të mbulojë pozitat 1 dhe 2.

Broadway, i njohur si një shënues i shkëlqyer dhe lojtar i kompletuar, pritet të sjellë energji dhe efektivitet në skuadër, teksa Grapeland Rahoveci synon rikthimin në Superligën e Kosovës në basketboll.

Sezonin e kaluar, Broadway ishte pjesë e Minot State në NCAA Division 2, ku regjistroi mesatare prej 13.5 pikësh për ndeshje. Ai u shqua me një saktësi prej 45% për gjuajtjet nga distanca, duke treguar aftësinë e tij si një kërcënim konstant nga jashtë harkut. Për më tepër, ai kontribuoi me 3.8 kërcime, 1.3 topa të vjedhur dhe kishte një saktësi të lartë prej 80% nga gjuajtjet e lira.

Me këtë transfer, Rahoveci dëshmon edhe njëherë ambiciet e tij për t’u rikthyer si një forcë e rëndësishme në basketbollin kosovar. Tifozët “vreshtarët” tashmë mund të shohin me optimizëm drejt idesë reale për rikthim në elitën e basketbollit kosovar.

/AsistiOnline.com/