Fetahu thotë se e ardhmja e basketbollit tonë është e ndritur

Kosova i dha fund ëndrrës për kualifikim në Kampionatin Botëror të basketbollit që zhvillohet në vitin 2027 pasi humbja nga Zvicra në Prishtinë shuajti të gjitha gjssat e dardanëve për të vazhduar tutje.

Përkundër këtij eliminimi, Kryetari i Federatës së Basketbollit të Kosovës, Arben Fetahu ka thënë se menjëherë do të fillojnë me punën për parakualifikimet për FIBA Eurobasket 2029, që do të fillojnë në nëntor të vitit 2025.

“Pavarësisht përfundimit të kësaj gare, ne nuk do të ndalemi këtu. Sytë tanë janë të drejtuar drejt së ardhmes – parakualifikimet për FIBA Eurobasket 2029, që do të fillojnë në nëntor të vitit 2025. Presim me padurim shortin gjatë verës dhe do të vazhdojmë përgatitjet me përkushtim dhe vendosmëri”, ka thënë Fetahu për faqen zyrtare të FBK-së.

Ai ka shtuar se do të punohet shumë me klubet për gjeneratat e reja pasi, sipas tij, aty është e ardhmja e basketbollit kosovar.

“Ne jemi të përkushtuar që të punojmë edhe më shumë me klubet dhe grupet e tjera të interesit për të zhvilluar basketbollin e të rinjve, të cilët janë e ardhmja e Përfaqësueses së Kosovës”.

Fetahu mbyll deklarimin e tij me një optimizëm të madh, duke theksuar se “E ardhmja është e ndritur dhe së bashku, me punë të palodhshme dhe përkushtim, do ta ndërtojmë atë”.