Michael Myers rrezikon të mungojë minimum në tri ndeshje për Trepçën

Basketbollisti i Trepçës, Michael Myers, mund të përballet me një dënim të rëndë pas incidentit të ndodhur në ndeshjen kundër Vëllaznimit. Informatori i xhiros së 24-të në Superligën e Kosovës në basketboll pritet të dalë të hënën, ku do të përcaktohet edhe vendimi për këtë rast.

Sipas propozicioneve të garave të Federatës së Basketbollit të Kosovës, Myers mund të ndëshkohet me të paktën tri ndeshje mosparaqitje, përveç një gjobe financiare, pas konfrontimit fizik me Antwan Walker të cilin e goditi me top në fytyrë.

Në rast të një vendimi të tillë, Trepça do të jetë e detyruar të luajë pa të në përballjet kundër Prishtinës, Prizrenit dhe Pejës.

Përveç incidentit mes Myers dhe Walker, pas ndeshjes u raportua edhe një konflikt verbal mes trajnerit të Trepçës, Adis Beciragic, dhe basketbollistit Mikaile Tmusic, që për pak sa nuk u shndërrua në një përleshje fizike. /DueliSportiv/