Bardh Rexha monstruoz me double-double, dërgon Grapeland Rahovecin në finalen e madhe

Grapeland Rahoveci ka siguruar një vend në finalen e madhe të Ligës së Parë, pas një fitoreje vendimtare ndaj New Basket në ndeshjen e tretë të serisë gjysmëfinale.

Skuadra vreshtare triumfoi me rezultat 84-76, duke siguruar kalimin në finalen e kampionatit, ku do të përballet me KEK-un për titullin e më të mirit në Ligën e Parë.

Heroi absolut i kësaj fitoreje ishte Bardh Rexha, i cili zhvilloi një paraqitje monstruoze me një double-double spektakolar prej 30 pikësh dhe 17 kërcimesh. Ai u tregua i pandalshëm për mbrojtjen prizrenase dhe ishte lojtari vendimtar në momentet më kritike të sfidës, duke udhëhequr Grapeland Rahovecin drejt finales.

Në anën tjetër, për New Basket nuk mjaftuan përpjekjet e Jordan Robinson dhe Idoll Pallushit, të cilët realizuan nga 19 pikë secili. Edhe pse luftuan deri në fund, prizrenasit nuk arritën të ndalin furinë e ekipit rahovecas, i cili siguroi biletën për finalen.

Tani, Grapeland Rahoveci do të përballet me KEK-un në finalen e madhe të Ligës së Parë, ku synon të kurorëzojë këtë sezon të suksesshëm me trofeun e kampionit dhe promovimin në Superligën e Kosovës. /AsistiOnline.com/