Trepça me postim falenderues për Sefajën dhe Misinin për kontributin e tyre në sukseset e klubit

Klubi i basketbollit Trepça ka bërë një postim të veçantë falënderues në faqen zyrtare, për dy figurat kyçe të suksesit të viteve të fundit: presidentin Vullnet Sefaja dhe zëvendëspresidentin Lindrit Misini.

Përmes një mesazhi të publikuar në rrjetet sociale, klubi mitrovicas shprehu mirënjohje të thellë për angazhimin dhe përkushtimin e tyre, duke theksuar se falë vizionit dhe udhëheqjes së tyre, Trepça ka arritur suksese të rëndësishme, ka fituar tituj dhe ka shkruar historinë në basketbollin kosovar.

“Kjo nuk do të ishte e mundur pa vizionin, udhëheqjen dhe punën e palodhshme të dy figurave kyçe: presidentit Vullnet Sefaja dhe zëvendëspresidentit Lindrit Misini. Falënderojmë nga zemra për gjithçka që keni bërë për klubin, për mbështetjen e pakushtëzuar dhe për punën e jashtëzakonshme që ka sjellë këto suksese,” shkruhet në postimin e klubit.

Në fund të mesazhit, Trepça thekson se misioni i klubit vazhdon dhe se suksesi i arritur është vetëm fillimi i një rruge të gjatë drejt objektivave të reja.

/AsistiOnline.com/