Një rikthim plot emocione – Besim Braha sonte përsëri në palestrën e ndaj klubit që i dha gjithçka

Sonte, në palestrën legjendare “Minatori” në Mitrovicë, do të luhet një ndeshje me peshë të veçantë emocionale – jo për shkak të rëndësisë në renditje, por për shkak të një rikthimi që prek thellë zemrat e tifozëve.

Besim Braha, njeriu që dikur mbajti gjallë Trepçën në kohët më të vështira, duke sakrifikuar gjithçka – madje edhe pasurinë e familjes – do të rikthehet sonte në shtëpinë ku i dha jetë një historie të gjatë dashurie me basketbollin. Por këtë herë, ai do të jetë në anën tjetër: Si drejtor sportiv i klubit të Borës klub me të cilin e lidhi ana profesionale e punës.

Takimi mes Trepçës dhe Borës nis nga ora 19:00 dhe ka rëndësi të madhe për mitrovicasit, që janë në ndjekje të kreut të tabelës. Por për Besim Brahen, ky do të jetë një udhëtim ndryshe – një ndeshje zemre, një përballje me kujtimet, përballë një ekipi të cilit ia dha shpirtin në kohët më të vëshira kur heroizëm ishte ta mbaje gjallë klubin nga shuarja, sepse gjithmonë kur kishte vështirësi shfaqej Besimi dhe nuk lejonte.

Një ndeshje që nuk është thjesht sportive, është emocionale për Brahën dhe tifozët e Trepçës, sidomos ata më të vjetër.

Vlen të ceket se klubi i Borës sivjet bëri një lëvizje të madhe me emërimin e Brahës si drejtor sportiv, pasi me të ardhur ai, erdhën rezultatet pozitive të ekipit dhe klubi arriti qëllimin kryesor, mbetjen në elitën e basketbollit kosovar në debutim në vitin e parë.

/AsistiOnline.com/