Vazhdon forma e lartë e nënkampionit, ndërsa Prizreni përshëndetet me Superligën

Golden Eagle Ylli është në top formë para garave shtesë. Ylli regjistroi fitoren e gjashtë radhazi në elitë, duke fituar ndaj Proton Cable Prizrenit me rezultat 97:102 (31:22, 30:28, 17:29, 19:23), në javën e 28-të të ProCredit Superligës.

Në pjesën e parë më të mirë ishin vendasit, ku fituan çerekun e parë 31:22, derisa të dytin 30:28, për të shkuar në pushim me rezultat 61:50.

Ylli u rikthye fuqishëm në pjesën e dytë, përkatësisht periodën e tretë, ku ishte më i mirë, 17:29, ndërsa shifrat pas 30 minutash ishin 78:79. Kjo bëri që fituesi të vendosej në dhjetëminutëshin e fundit. Dy minuta nga fundit, vendasit po fitonin 93:91, por në momentet vendimtare, therandasit u treguan më të vëmendshëm dhe shënuan fitore të rëndësishme 97:102.

Te vendasit katër basketbollistë shënuan pikë dyshifrore, ku Drilon Shala e mbylli ndeshjen me 15 pikë e 15 kërcime, ndërsa Tervell Beck me 32 pikë e nëntë kërcime, ndërsa te mysafirët Lis Shoshi ishte i jashtëzakonshëm me 25 pikë e 15 kërcime, duke u ndihmuar nga Jan Palokaj me 24 pikë e gjashtë kërcime.

Pas 28 ndeshjeve, Proton Cable Prizreni është i fundit me pesë fitore e 23 humbje, ndërsa Golden Eagle Ylli me 15 fitore e 13 humbje, ka siguruar çerekfinalet e “Play-off”-it, por mbetet të mësojë kundërshtarin.

Garat e rregullta përfundojnë të dielën me ndeshjet Bashkimi-Peja dhe Vëllaznimi-Sigal Prishtina, që zhvillohen nga ora 20:00.