Turqia është një nga kombëtaret më të njohura të basketbollit evropian, me një histori të pasur dhe pritshmëri gjithmonë të larta. Nënkampione e EuroBasket 2001 dhe FIBA World Cup 2010, skuadra e njohur si 12 Gjigantët do të hyjë në këtë edicion me synimin për t’u rikthyer në podium.
Me trajnerin e suksesshëm Ergin Ataman në stol, turqit do të kërkojnë të përfitojnë maksimalisht nga përvoja dhe talenti i lojtarëve të tyre.
Në EuroBasket 2022, Turqia u ndal në fazën e 1/8 së finales pas një ndeshjeje dramatike ndaj Francës që shkoi në vazhdime. Këtë herë, me një përbërje të freskët dhe me yjet që luajnë në nivelet më të larta, synimi është të shkohet më larg.
Turqia është pjesë e Grupit A në Riga, ku do të përballet me nikoqirët Letonia, si dhe me Republikën Çeke, Portugalinë, Estoninë dhe Serbinë.
Skuadra e zgjeruar:
Alperen Şengün, Cedi Osman, Shane Larkin, Furkan Korkmaz, Sertac Sanli, Onuralp Bitim, Sadik Emir Kabaca, Sehmus Hazer, Berke Buyuktuncel, Ercan Osmani, Yiğitcan Saybir, Tarik Biberovic, Muhaymin Mustafa, Ismail Karabilen, Omer Yurtseven, Erkan Yilmaz.
Ylli i ekipit
Alperen Şengün
Qendra 22-vjeçare e Houston Rockets ka marrë rolin e liderit të gjeneratës së re të basketbollit turk. Pas dy sezoneve të shkëlqyera në NBA, ku në edicionin 2023/24 regjistroi mesatarisht 21.1 pikë, 9.0 kërcime dhe 5.0 asistime, Şengün është gati të shkëlqejë edhe në skenën evropiane. Në EuroBasket 2022 ai mbylli turneun me 16.5 pikë dhe 8.2 kërcime për ndeshje, shifra që pritet t’i tejkalojë këtë vit.
Trajneri
Ergin Ataman është një nga trajnerët më të suksesshëm dhe karizmatikë të basketbollit evropian. I njohur për stilin e tij të drejtpërdrejtë dhe motivimin që transmeton te lojtarët, ai ka fituar dy herë radhazi EuroLeague me Anadolu Efes (2021, 2022) dhe aktualisht drejton Panathinaikos, me të cilin fitoi edhe titullin e EuroLeague në vitin 2024. Në krye të Turqisë, Ataman synon të kthejë kombëtaren në ditët e lavdisë.
Orari i ndeshjeve:
27 gusht: vs Letonia (17:00 CET)
29 gusht: vs Republika Çeke (13:45 CET)
30 gusht: vs Portugalia (20:15 CET)
1 shtator: vs Estonia (13:45 CET)
3 shtator: vs Serbia (20:15 CET)
