Përfaqësuesja e Finlandës ka regjistruar fitoren e dytë radhazi në Eurobasket 2025, pasi mposhti bindshëm Britaninë e Madhe me rezultat 109–79. Në qendër të vëmendjes ishte ylli i NBA-s, Lauri Markkanen, i cili realizoi plot 43 pikë, duke vendosur rekord personal në një ndeshje zyrtare dhe njëkohësisht duke hyrë në listën e shënuesve më të mëdhenj në historinë e Eurobasket.
Markkanen tashmë është i barabartë me emra të mëdhenj si Dirk Nowitzki, Nikos Galis apo Emiliano Rodríguez, të cilët kanë arritur shifra të ngjashme.
Në këtë ndeshje, trajneri Lassi Tuovi vendosi ta menaxhojë rotacionin, duke i dhënë pak minuta Edon Maxhunit, i cili luajti 11 minuta, realizoi 5 pikë dhe regjistroi 2 asistime. Vendimi shihet si ruajtje e forcave për sfidat më të rëndësishme që e presin Finlandën në vazhdim.
Pas dy fitoreve në dy ndeshjet e para, Finlanda tashmë e sheh veten në krye të grupit dhe synon të vazhdojë formën e shkëlqyer në përballjen e tretë kundër Malit të Zi. /AsistiOnline.com/
