Kombëtarja e Turqisë ka vazhduar ecurinë perfekte në Eurobasket 2025, duke regjistruar fitoren e dytë radhazi në fazën e grupeve dhe duke u afruar gjithnjë e më shumë kualifikimit në raundin e dytë të turneut.
Kësaj here, vëmendjen e mori shqiptari me prejardhje nga Tropoja, Erxhan Osmani, i cili u shfaq në formë të shkëlqyer. Ai ishte pikëshënuesi i tretë më i mirë i skuadrës turke me 16 pikë, ndërsa shtoi edhe 3 kërcime dhe 1 asist në paraqitjen e tij solide.
Lojtari më i spikatur i ndeshjes për Turqinë ishte Alperen Sengun, i cili ishte pranë një triple-double, duke përfunduar sfidën me 23 pikë, 12 kërcime dhe 9 asiste. Performanca e tij mbajti gjallë ritmin ofensiv të ekipit, ndërsa përkrahja nga lojtarët si Osmani e bëri Turqinë të duket edhe më e rrezikshme.
Me këtë fitore, Turqia forcon pozitën në grup dhe tashmë është shumë pranë sigurimit të fazës së dytë. Ndeshja e tretë do të zhvillohet kundër Portugalisë, ku turqit do të kërkojnë konfirmimin e statusit si një prej skuadrave më të forta të këtij edicioni të Eurobasket.
Fitorja e dytë, forma e mirë e lojtarëve kyç dhe kontributi i Erxhan Osmanit janë sinjal i qartë se Turqia synon të shkojë larg në këtë garë. /AsistiOnline.com/
