Gjermania është shpallur kampione e EuroBasket 2025 pasi mposhti Turqinë 88-83 në finalen e zhvilluar në Riga.
Një ndeshje dramatike që u vendos në minutat e fundit solli suksesin e dytë historik për gjermanët në këtë garë pas titullit të vitit 1993, duke kompletuar kështu ciklin e madh pas triumfit në Kupën e Botës 2023.
Isaac Bonga ishte lojtari më i mirë me 20 pikë, ndërsa Dennis Schröder, i shpallur MVP i turneut, shënoi pikët vendimtare dhe mbajti ekipin në kontroll në çastet e fundit.
Për Turqinë, Alperen Şengün shkëlqeu, por nuk mjaftoi për t’i dhënë vendit e tij trofeun e parë europian.
Gjermania e arriti finalen pasi eliminoi Finlandën në gjysmëfinale, ndërsa trajneri Álex Mumbrú u shpreh se loja kolektive dhe besimi i krijuar gjatë turneut ishin çelësi i suksesit.
Schröder tha pas finales se kjo ishte një provë karakteri dhe falënderoi shokët e skuadrës për mbështetjen.
Me këtë triumf, Gjermania konsolidohet si një fuqi e basketbollit europian dhe botëror, duke konfirmuar vazhdimësinë e brezit të artë që po shkruan historinë. /AsistiOnline.com/
