Mitrovica është me sytë nga Samokovi i Bullgarisë, aty ku sonte Trepça do ta zhvillojë përballjen e parë në kualifikimet e Ligës së Kampionëve në basketboll.
Përballë “xehetarëve” do të jetë kampioni i Holandës, Heroes Den Bosch – një prej klubeve më të trofeshëm në këtë vend.
Ndeshja pritet të nisë nga ora 20:00, ndërsa një fitore e Trepçës do ta afronte ndjeshëm skuadrën drejt fazës së grupeve të kësaj gare prestigjioze evropiane.
Përkrahja nuk do të mungojë as në Bullgari, pasi krahas ekipit kanë udhëtuar edhe tifozët e zjarrtë të “Torcidës”, të njohur për energjinë dhe mbështetjen e tyre të vazhdueshme ndaj skuadrës mitrovicase. /AsistiOnline.com/
