Klubi i ri i basketbollit KB Policia e Kosovës është themeluar këtë vit dhe pritet të marrë pjesë në edicionin e ri të Ligës së Dytë të Kosovës. Ky është një projekt i veçantë, pasi ekipi përbëhet tërësisht nga lojtarë që janë pjesëtarë të Policisë së Kosovës.
Trajner i skuadrës është emëruar Gazmend Merovci, ndërsa postin e drejtorit të klubit do ta mbajë Arsim Rashica. Të dy së bashku po udhëheqin procesin e organizimit dhe përgatitjeve të ekipit për sezonin që po afrohet.
KB Policia e Kosovës ka filluar stërvitjet me synimin për të qenë konkurrues në garën e re, ndërsa përveç aspektit sportiv, ky projekt shënon edhe një formë të re të angazhimit të policëve në aktivitete sportive dhe komunitare.
Me hyrjen e tyre në Ligën e Dytë, basketbolli kosovar fiton një skuadër tjetër që pritet të sjellë frymë të re dhe histori interesante në arenën vendore. /AsistiOnline.com/
