Sonte në palestrën “Sezai Surroi” në Prizren, Bashkimi do të përballet me skuadrën franceze Dijon në kuadër të fazës së grupeve të FIBA Europe Cup.
Takimi fillon nga ora 19:00 dhe pritet të sjellë një mbrëmje të fortë basketbolli për tifozët prizrenas.
Ashtu si kundërshtari i tyre, edhe Bashkimi ka regjistruar dy humbje në ndeshjet e para të grupit dhe sonte do të kërkojë fitoren e parë në këtë edicion. Për skuadrën portokalli, ky duel para tifozëve të vet përbën mundësinë ideale për t’u rikthyer në rrugën e rezultateve pozitive.
Bashkimi pritet të mbështetet në lojën kolektive, ritmin e shpejtë dhe përkrahjen e zjarrtë të publikut prizrenas, i cili gjithmonë di të krijojë një atmosferë të veçantë në “Sezai Surroi”.
Fitorja ndaj Dijonit do të ishte një shtysë e madhe për ekipin, që kërkon të mbajë gjallë shanset në garat evropiane dhe të rifitojë besimin pas startit të vështirë në grup. /AsistiOnline.com/
