Përfaqësuesja e Kosovës në basketboll ka marrë një shtytje të madhe para fillimit të parakualifikimeve për EuroBasket 2029, pasi në skuadër është rikthyer fundori amerikan i natyralizuar, Divine Myles.
Pas një mungese të shkurtër, ai i është bashkuar sërish “Dardanëve”, ku vazhdon të jetë një figurë kyçe dhe një nga lojtarët më konstantë të këtij projekti.
Myles është tashmë lojtari i natyralizuar me më së shumti paraqitje për Kosovën, gjithsej 8 ndeshje, të cilat i ka zhvilluar në tri cikle të rëndësishme kualifikimesh:
2025
- FIBA Basketball World Cup 2027 – European Pre-Qualifiers: 2 ndeshje
2021
- FIBA Basketball World Cup 2023 – European Pre-Qualifiers: 2 ndeshje
2019
- FIBA EuroBasket 2021 – Pre-Qualifiers: 4 ndeshje
Natyralizimi i tij ishte bërë nga ish-selektori amerikan Brad Greenberg, periudhë gjatë së cilës Kosova shënoi edhe suksesin më të madh të saj historik – kualifikimin nga parakualifikimet. Megjithatë, në fazën e kualifikimeve të plota, Kosova nuk arriti të përparojë më tej.
Përveç Myles, lista e lojtarëve të natyralizuar me më së shumti paraqitje për Kosovën përfshin:
- Scott Bamforth – 7 paraqitje
- Justin Doellman – 5 paraqitje
- Dominic Artis – 5 paraqitje
- Shawn Jones – 3 paraqitje
- Malcolm Armstead – 2 paraqitje
Rikthimi i Divine Myles vlerësohet si tejet i rëndësishëm, duke pasur parasysh përvojën, intensitetin dhe ndikimin e tij në lojën e Kosovës. Ai pritet të jetë një prej shtyllave kryesore në tentimin e radhës për të kaluar fazën e parakualifikimeve, teksa Kosova synon të ndërtojë një skuadër më stabile dhe më konkurruese për EuroBasket 2029. /AsistiOnline.com/
