Gezim Kastrati është një nga figurat më përfaqësuese të skijimit kosovar dhe një prej sportistëve që, përmes rezultateve dhe përfaqësimit ndërkombëtar, kontribuoi drejtpërdrejt në rrugën e pavarësimit të sportit të Kosovës.
I lindur dhe i rritur në një familje me traditë të thellë skitare, lidhja e tij me skijimin nisi shumë herët. Daja i tij, Ismajl Gagica, ishte ndër pionierët e parë të skijimit në Brezovicë, duke sjellë ski nga Evropa dhe duke ushtruar këtë sport edhe në qendra të njohura skitare evropiane, së bashku me dajën tjetër, Haki Gagica. Në moshën vetëm 4-vjeçare, në vitin 1980, në qendrën skitare Vitosha të Bullgarisë, babai i tij, Baki Kastrati, e mësoi Gezim Kastratin të skijonte, duke i hedhur themelet e një karriere të gjatë sportive.
Fillimisht, ai u aktivizua me Klubin Skitar “Prishtina” dhe në vitin 1986, në garat federative për kategorinë “Pionierë të rinj”, arriti rezultate të nivelit të parë dhe të tretë. Megjithatë, për shkak të manipulimeve në renditje, mbeti pa medalje, një zhgënjim që ndikoi ndjeshëm në vazhdimësinë e tij në garat zyrtare të asaj kohe. Për disa vite, skijimi mbeti për të një pasion dhe aktivitet hobi, por jo një kapitull i mbyllur.
Në vitin 1993, mori ftesë nga Federata Skitare e Kosovës për të garuar në Kampionatin e Republikës së Kosovës, në një periudhë vendimtare për sportin kosovar dhe përpjekjet drejt pavarësimit të tij. Nga viti 1993 deri më 2000, Gezim Kastrati garoi për klubin “Universiteti”, duke u shpallur për 8 vite radhazi Kampion i Kosovës në kategoritë Junior i Ri, Junior i Vjetër dhe Senior.
Gjatë kësaj periudhe, ai garoi në disiplinat alpike: Sllallom, Sllallom i Madh dhe Super G, duke regjistruar gjithsej 36 fitore, 2 vende të treta dhe vetëm 1 diskualifikim, statistika që dëshmojnë dominimin e tij në skenën vendore.
Kampionatet e Kosovës zhvilloheshin rregullisht në qendra të ndryshme skitare si Prevallë, Bogë, Dragash dhe Tetovë, si dhe në gara tradicionale që shndërroheshin në festivale të mirëfillta sportive, si:
- Kupa e Alpit
- Kupa e Prevallës
- Kupa e Rusolisë
- Kupa e Prizrenit
- Kupa e Sharrit
- Kupa e Bjeshkëve të Nemuna
- Kupa Shqiptare
Për 8 vite radhazi, Gezim Kastrati u rendit në mesin e 10 sportistëve më të dalluar të Republikës së Kosovës, duke u shpallur gjithashtu skitari më i mirë në Kryeqytet.
Përfaqësimi ndërkombëtar i Kosovës ishte synimi i tij kryesor. Për shkak të pamundësisë për pjesëmarrje zyrtare në garat e FIS-it, ai mori pjesë si pararendës apo test-garues, përfshirë garën në Ulludag, Turqi (1995).
Pas luftës, në vitin 2000, Gezim Kastrati shënoi një moment historik për sportin kosovar, duke ngritur për herë të parë flamurin kombëtar të Kosovës në gara ndërkombëtare, në garën Ballon D’Alsace në Francë, ku u rendit i 10-ti në disiplinën Downhill. Më pas, në Remata të Sllovakisë, arriti vendin e 5-të, në një kohë kur ky shtet ende nuk e njihte Republikën e Kosovës. Në këtë kontekst, ai konsiderohet sportisti i parë skitar që përfaqësoi Kosovën ndërkombëtarisht, pas karateistes Shqipe Zogiani.
Dashuria për skijimin ndikoi edhe në rrugën akademike të tij. Ai zgjodhi Austrinë për studime, ku krahas edukimit, përfaqësoi Kosovën në garat universitare, duke u shpallur nënkampion i Universiteteve të Steiermark-ut. Në Austri, vendin e skijimit botëror, krijoi kontakte të rëndësishme dhe u takua me emra të njohur të skijimit si Herman Maier, Bode Miller, Aksel Lund Svindal, Kristian Ghedina, Mario Matt, Benjamin Raich, dhe shumë të tjerë. Përmes këtyre lidhjeve, ai ndihmoi Federatën Skitare të Kosovës, duke sjellë edhe pajisjen e parë digjitale për matjen e kohës në vend.
Gjatë luftës, shumë nga trofetë, diplomat, dokumentacioni dhe materialet e tij u vodhën ose u shkatërruan, por disa prej tyre mbijetuan dhe ruhen me krenari si dëshmi e një periudhe historike për sportin kosovar.
Pas luftës, qendra skitare e Brezovicës mbeti për një kohë të gjatë e paarritshme për sportistët shqiptarë. Pas tri vitesh përpjekjesh të vazhdueshme nga Federata Skitare e Kosovës, me figura si Hajrush Demaj, Ismail Kosumi, Emin Dushullovci, Xheladin dhe Xhevahir Islami, si dhe me mbështetjen e KFOR-it, u arrit hapja e qendrës për të gjithë.
Sot, Gezim Kastrati vazhdon të kontribuojë në zhvillimin e skijimit në Kosovë, duke besuar se vendi ka potencial për mbi 55 qendra skitare, nga të cilat 15 mund të plotësojnë kushtet për FIS. Me mbështetjen institucionale, përfshirë Kryetarin Rama, ai është i angazhuar në mënyrë aktive për zhvillimin e Qendrës së Skijimit dhe Rekreacionit në Gërmi – Prishtinë, si një investim afatgjatë për sportin dhe të rinjtë e Kosovës. /AsistiOnline.com/
