YLLI FITON DERBIN FANTASTIK NDAJ PRIZRENIT
Prishtinë(AsistiOnline) – Golden Eagle Ylli e ka nisur stinorin e ri në Superligën e Kosovës me fitore të madhe në udhëtim ndaj Ponte Prizrenit.
Therandasit kanë triumfuar ndaj prizrenasve në “Sezai Surroi” me rezultatin final të ndeshjes, 77-85.
Ndeshja ishte tepër interesante me Ponte Prizrenin që e nisi më mirë, duke e fituar periodën e parë me shifra 21-16, ndërsa perioda e dytë i takoi minimalisht Yllit, 24-25, ndërsa në pjesën e dytë, Ylli e mori më seriozisht ndeshjen, fillimisht duke e fituar çerekun e tretë, 16-20 me ç’rast kjo periodë u mbyll baraz në rezultat(61-61) e fitorja e Yllit erdhi në çerekun e fundit(16-24), kur “xhebrailat” u treguan të kujdesshëm në lojën e tyre, kundrejt Ponte Prizrenit që në pjesën e dytë, nuk arriti të mbajë avantazhin e pjesës së parë e kjo i kushtoi me humbje.
Më meritorët pse Ylli e fitoi takimin e sontëm ishin: Samir Zekiqi me 24 pikë e amerikani Cody John që realizoi 24 sosh, por me lojë të mirë u dalluan edhe Valon Bunjaku me 16 pikë e Rilind Krasniqi me 5 pikë.
Tek Ponte Prizreni s’mjaftuan për fitore, Ty Nichols e Justin Jones me nga 22 pikë e Arti Hajdari me 19 sosh.
Në xhiron e ardhshme, Yllit e pret në shtëpi Bashkimin, ndërsa Ponte Prizreni udhëton në Gjakovë për tu takuar me Vëllaznimin e promovuar në Superligë.
/AsistiOnline.com/
Komentet janë të mbyllura.