NDESHJA E SONTME SHPRESË PËR PEJËN, BESIM PËR YLLIN NË TITULLIN E PARË

Prishtinë(AsistiOnline) – Sonte zhvillohet ndeshja e tretë e serisë finale e ”play off”-it të Superligës së Kosovës ndërmjet Pejës dhe Yllit.

Kjo sfidë është ‘jetike’ për Pejën sonte, do të thotë të jesh apo të mos jesh sepse me fitore vazhdon shpresën për titull e me humbje eliminohet, ndërsa për Yllin kjo fitore do të ishte historike sepse do t’ia sillte titullin e parë të kampionit të Kosovës.

Skuadra nga Theranda ka fituar dy ndeshjet e para dhe i mungon edhe një fitore për tu shpallur kampion, që do të ishte i pari në histori të klubit. Ndërkohë, pejanët hyn për fitore për të ngushtuar serinë në 1:2, ku do të rikthehet edhe AJ Walton, i cili ishte i suspenduar.

Dy ndeshjet e para të kësaj serie i fitoi Ylli, fillimisht triumfoi në ”Karagaçi” 75:83, kurse sfidën e dytë e fitoi në shtëpi 75:73, me një fund tejet dramatik.

Për të arritur deri në këtë pikë, Peja në çerekfinale kishte mundur Sigal Prishtinën 2:1, derisa në gjysmëfinale u përballë me Ponte Prizrenin, ku kaluan në finale me serinë 3:2, pasi takimi i fundit ishte ndërprerë pas pjesës së parë dhe u takoi pejanëve me rezultat zyrtar 20:0.

Golden Eagle Ylli në çerekfinale eliminoi Bashkimin 2:1, edhe pse humbi sfidën e parë, ndërsa në gjysmëfinale pas pesë sfidave shumë interesante eliminoi Rahovecin në seri tejet të mundimshme 3:2.

Ndeshja Peja-Golden Eagle Ylli, që zhvillohet sonte nga ora 20:15 në ”Karagaqi”, transmetohet në ArtMotion, ndërsa rezultatin për çdo çerek me koshashënuesit e dalluar, por edhe raportin final e të detajuar të ndeshjes mund ti gjeni në portalin e vetëm në trojet shqiptare, dedikuar ekskluzivisht basketbollit – www.AsistiOnline.com

/AsistiOnline.com/