SELEKTORI MARMARINOS FLET PARA PËRBALLJES SË SONTME

Përzgjedhësi i Kosovës, Christos Marmarinos ka folur para përballjes që Kosova e zhvillon sonte kundër Norvegjisë në kuadër të parakualifikimeve për EuroBasket 2025.

“Përgatitjet kanë shkuar shumë mirë. Fatmirësisht nuk kemi lëndime dhe jemi përgatitur maksimalisht për të qenë të gatshëm për këtë ndeshje. E dimë se si ishte sfida e parë, andaj nuk duhet të bëjmë gabimet e njëjta”, është shprehur Marmarinos për faqen zyrtare të FBK-së.

Takimin e parë e fitoi Norvegjia me rezultat 86:77. “Për në është shumë i rëndësishëm ky takim. Është vendimtar. Jemi munduar të përgatitemi siç duhet për këtë sfidë dhe shpresoj të fitojmë. Ajo që mund të them është se do të japim më të mirë tonë, duke shpresuar në rezultat pozitiv”, shtoi tutje përzgjedhësi i Kosovës.

Ai flet edhe për gjasat e Kosovës në Grupin C të rrethit të parë parakualifikues për Eurobasket 2025. “Kemi një fitore e një humbje, duke shpresuar se do të regjistrojmë fitoren e radhës. Ne do të marrim ndeshjet një nga një. Sigurisht se synojmë të avancojmë në rrethin e radhës. Besoj se me përkrahjen e tifozëve mund t’ia dalim”, theksoi Marmarinos.

Në Grupin C, Kosova, Danimarka dhe Norvegjia kanë nga një fitore dhe një humbje. Dardanët kanë një fitore (ndaj Danimarkës 78:73) dhe një humbje (nga Norvegjia 86:77). Vendi i parë kualifikohet tutje dhe vendi i dytë më i mirë nga tri grupet parakualifikuese.

/FBK/