TEUTA E MPOSHT THELLË TIRANËN NË DUELIN TJETËR ÇEREKFINAL TË UNIKES

Prishtinë(AsistiOnline) – Derbi i skuadrave nga Shqipëria në çerekfinale të Ligës Unike i ka takuar Teutës.

Durrsakët kanë triumfuar ndaj kryeqytetasve të Tiranës me shifra goxha të thella 96-81.

Pjesa e parë e ndeshjes ishte më interesante dhe u mbyll ngushtë 50-47, derisa dallimi u bë në pjesën e dytë me vendasit që si duket ndezën ‘motorët’ mirë dhe fituan ndeshjen me meritë.

Katër basketbollistë realizuan pikë dyshifrore te Teuta në këtë fitore, Nassir Core (24), Tyler Peterson (22), Frenki Lilaj (21) dhe Tamas Bruce (11).

Te Tirana me lojë të mirë u shquan, Juljan Hamati me 20 pikë, Endrit Hysenagolli me 17, Klein Strazimiri me 16 dhe Eldi Hysa me 12 sosh.

Teuta tash ka avantazhin e serisë ndaj Tiranës në 1-0 dhe këta të fundit nëse duan kalimin tutje, duhet që Teutën në duelin kthyes ta mposhtin me 16 pikë diferencë.

/AsistiOnline.com/