KOSOVA SOT NDAJ DANIMARKËS NË PARAKUALIFIKIMET E EUROBASKET 2025

Përfaqësuesja e Kosovës A te meshkujt sot zhvillon duelin e fundit të grupit C në kuadër të parakulifikimeve për Eurobasket 2025.

Basketbollistët e Kosovës prej javësh u stërvitën në Prishtinë, para kësaj përballje të rëndësishme dhe sot synohet fitorja edhe pse do të jetë shumë e vështirë.

Përballja ndaj danezëve do të zhvillohet në Naestved nga ora 19:00. Kjo sfidë është e vlefshme për rrethin e parë parakualifikues të FIBA Eurobasket 2025.

Në ndeshjen e parë të zhvilluar në mes këtyre dy kombëtareve, fitore kishte shënuar Kosova 78:73. Dardanët më pas pësuan dy humbje nga Norvegjia, që ka dy fitore e një humbje, kurse Danimarka ka një fitore e një humbje.

Kosova sot vuan mungesën e shumë lojtarëve dhe ka udhëtuar në Danimarkë vetëm me 11 basketbollistë, madje siç ka mësuar AsistiOnline.com nga ky grup në pikëpyetje për t’u paraqitur është edhe Meriton Ismaili.

Ndeshja e fundit e Grupit C zhvillohet më 3 Korrik mes Norvegjisë dhe Danimarkës.